Turmush — Ысык-Көл облусунун Түп районунда 75 үй-бүлөгө «Социалдык келишим» программасынын негизинде Эмгек, социалдык камсыздоо жана миграция министрлигинин 150 000 сомдук сертификаты тапшырылды.
Маалым болгондой, Түп районуна 2026-жылы 192 квота бекиген. Бүгүнкү сертификаттын ээлеринин ичинен 71 үй-бүлө мал чарба багытында, 3 үй-бүлө малина, карагат, бүлдүркөн өстүрүү багытында, 1 үй-бүлө майда соода багытында иш алып барышмакчы.
Сертификат тапшыруу иш чарасында 2023-2024-жылдар аралыгында социалдык келишимдин негизинде каражат алып, бүгүнкү күндө ишин ийгиликтүү улантып жаткан Наргиза Айтназарова (Тогуз-Булак айылы), Мээрим Хиснулинова (Михайловка айылы) жана Жанат Кадыракунова (Кутургу айылы) өздөрүнүн иш тажрыйбаларын бөлүштү.
Ал эми 4 жыл аралыгында жалпы 722 үй -бүлө социалдык келишим менен жардам алды.
Социалдык контракт деген эмне?
Социалдык контракт — бул аз камсыздалгандыгы боюнча ай сайын жөлөк пул алган үй-бүлөлөргө колдоо көрсөтүүнүн жаңы түрү. Аз камсыздалган үй-бүлөнүн каалоосу боюнча социалдык өнүгүүнүн аймактык органдары менен өз ара милдеттенмелер тууралуу макулдашуу түзүп, жөлөк пулдун жылдык же жылдык суммасынан 75% алса болот. Бул каражат мал чарбасын, өсүмдүк өстүрүүнү же майда ишкерликти өнүктүрүүгө жумшалса болот. Социалдык контрактка катышууну каалаган ар бир үй-бүлө социалдык адаптация программасын иштеп чыгып, аны социалдык өнүгүү жана жергиликтүү өз алдынча башкаруу органдарынын колдоосу жана көмөгү менен ишке ашырат.
Социалдык контракттын сунушталган стратегиясы республика жана Бишкек шаары («Үй-бүлөгө көмөк» жөлөк пулун алгандар) боюнча аз камсыз болгон үй-бүлөлөргө багытталган.