Turmush — Баткен районунун Кара-Булак айылындагы 11-класстын окуучусу Асема Аскарбек кызы 8-класстан бери предметтик олимпиададан орус тили жана адабияты сабагынан республикалык турга чейин жетип, байгелүү орундарга жетишип келет.
Анын айтымында, быйыл да аталган предметтен республикалык турда 3-орунду ээледи.
«Мен Баткен областтык жалпы билим берүү жатак мектебинин 11-классынын окуучусумун. 8-класста биринчи жолу олимпиадага катышкан болчумун. Ошондо 3 жыл бою орун алуу менин оюма да келген эмес эле.
Билимди баалоо жана окутуу усулдары борборунун олимпиадалык тапшырмалары профилдик сабак боюнча билимди гана эмес, чыгармачылыкты жана сынчыл ой жүгүртүүнү да өнүктүрөт. Ошондуктан мен аларды чечкенди жакшы көрөм. Олимпиаданын атмосферасы дал атаандаштыкка ширелген. Алдыңкы үчтүкө кирбей калсаң да жаңы таанышуулар, атаандаштык руху чыңдалганы бардык эмгекти актайт.
Айрыкча жыл сайын менин ой жүгүртүүм кантип өзгөрүп жатканын байкаган жагат. 8-9-класстарда мен жеңиш жөнүндө гана ойлочумун жана ийгилик менин түшүнүгүм боюнча ошол болчу. Бирок бул жылы көп нерсе өзгөрдү. Жеңишке жетердеги процессти ийгилик деп өзүмө белгиледим.
Олимпиадага катышкан окуучулардын 70% келечекте Кыргызстандын эң таасирдүү адамдарынын бири болот. Алар менен таанышкан сайын алардын акылына, өжөрлүгүнө жана тапкычтыгына суктанып бүтпөйм. Ошондуктан олимпиада - бул мыкты нетворкинг үчүн да жакшы мүмкүнчүлүк.
Олимпиадага катышуу мага күчтүү болууну жана кандай гана шарт болбосун аягына чейин барууну үйрөттү. Ошондой эле мен тагдырга мурункудан да көбүрөөк ишене баштадым. Канча акылдуу болсоң да, эгер ал сенин тагдырыңда жазылбаса, ал ишке ашпай калышы мүмкүн. Бул нормалдуу көрүнүш. Сен үчүн жазылган нерсе эч качан сенден өтүп кетпейт.
3 жылдын ичинде мен эң негизги нерсени түшүндүм десем жаңылышпайм. Жыйынтыкка жетиш үчүн бардык нерсе жараткандан көз карандыдай дуба кылуу керек жана бардык нерсе өзүңдөн көз карандыдай эмгектенүү керек. Кудайга 100% ишенип, өзүң да 100% аракет кылуу зарыл экен.
8-класста олимпиада мага канчалык ийгиликтүү болсоң дагы жөнөкөй жана боорукер адам болуп калууну үйрөттү. 9-класста дүйнөгө ачык болууну үйрөттү. Ал эми 11-класста бар нерсеге ыраазы болууну үйрөндүм.
Бул жылы мен олимпиадага 7 ай даярдандым. Эртең менен саат 6:00дон кечки 17:00го чейин окуп, андан кийин саат 20:00го чейин ЖРТнын тапшырмаларын, айрыкча «Грамматика» жана «Окуу жана түшүнүү» бөлүмдөрүн талдадым. Анткени олимпиада менен ЖРТ көп жагынан байланыштуу жана бир эле уюм тарабынан түзүлөт. Бул мезгил мени көп тапшырманы бир убакта аткарууга үйрөттү. Олимпиадага, ЖРТга даярдануу, кээ бир университеттерге документ тапшыруу - мунун баары адамды чыңдайт турбайбы.
Бул жеңил эмес күндөрдө жанымда болгон бардык адамдарга терең ыраазычылык билдирем. Айрыкча мектебиме, мугалимдер жамаатына жана классташтарыма колдоосу жана боорукер мамилеси үчүн чоң рахмат. Ошондой эле орус тилчи мугалимим Бактыгүл Ашировнага 3 жылдык эмгеги, колдоосу үчүн өзгөчө ыраазычылык билдирем. Ата-энеме бардык шарттарды түзүп бергенине жана дайыма колдоп жүргөнүнө чоң рахмат.
Быйыл мен мектепти жана олимпиададагы жолумду аяктап жатам. Бирок мен бул жолду өмүр бою эстей турган көз ирмемдер менен жыйынтыктап жатканыма аябай бактылуумун», - деди ал.